Пошук

«За Каляднай зоркай»: у Наваградку падвялі вынікі конкурсу хрыстаславаў

23 студзеня 2018

17 студзеня, у канцы святачнага тыдня, у зале Навагрудскага раённага цэнтра культуры і народнай творчасці прайшло свята «За Каляднай зоркай».

Свята сабрала 14 каманд хрыстаславаў горада і раёна для падвядзення вынікаў конкурсу. У зале прысутнічалі святары, сёстры сястрыцтва ў гонар апостала Іаана Багаслова, супрацоўнікі аддзела адукацыі райвыканкама, настаўнікі і бацькі дзяцей, прыхаджане храмаў.

На працягу ўсіх Святак хрыстаславы наведвалі дамы, арганізацыі, бальніцы, дзяліліся радасцю аб Ражджастве Хрыстовым з пажылымі і адзінокімі людзьмі, настаўнікамі-пенсіянерамі, ветэранамі вайны і працы, шматдзетнымі сем'ямі, дзецьмі-інвалідамі, выступалі перад школьнікамі і выхаванцамі дзіцячых садоў.

Усе каманды прадставілі свае прэзентацыі спраў міласэрнасці на Святках, падзяліліся радаснымі ўражаннямі.

Канцэртную праграму падрыхтавалі навучэнцы сярэдняй школы № 3. Прынялі ў ёй удзел і рабяты з сярэдняй школы № 4, гімназіі № 1, дзіцячай школы мастацтваў, нядзельнай школы пры сястрыцтве.

Яркім і маляўнічым атрымалася свята: не толькі песні, вершы, танцы і інсцэніроўкі зрабілі праграму насычанай, але і слова аб веры, таямніцы нараджэння Богадзіцяці Хрыста на зямлі і сэнсе чалавечага жыцця.

Святар Дзімітрый Смурага падзякаваў хрыстаславам і арганізатарам свята.

Старэйшая сястра міласэрнасці Ірына Кокаш адзначыла працу кожнай каманды, усім былі ўручаны дыпломы, калядныя сувеніры і падарункі.

Навагрудская епархія / Church.by